مصر حاليا علي اعتاب شبهة ازمة جديدة هتحصل في قطاع اللحوم، والازمة دي هترفع اسعار اللحوم والفراخ بشكل غريب وفعلا بدأت الازمة دي تظهر.. ياتري اية هيا الأزمة دي وازاي هتاثر علي اسعار اللحوم في الاسواق.. تابعونا للآخر وهتعرفوا التفاصيل

اللي متابع للاسواق حاليا هيلاحظ أن في زيادة حصلت باكتر من 20 جينه علي أسعار الفراخ بالاسواق، ومش هيعرف السبب الجديد في الزيادة خصوصا ان اسعار الاعلاف في مصر مستقرة من فترات بعيدة، وكمان اسعار الاعلاف كل يوم بتنخفض عن اللي قبله، يعني مفيش ازمة جديدة في اسعار الاعلاف زي ما التجار كانوا بيتحججوا علشان يرفعوا الأسعار، ولا في ازمة جديدة في قطع الكهرباء واللي برضوا التجار اتحججوا فيها فترة طويلة بحجة أن قطع الكهرباء بيخلي نسبة كبيرة من الفراخ تموت بسبب درجات الحرارة المرتفعة.
طيب اية اللي حصل دلوقتي خلي اسعار الفراخ ترجع ترتفع تاني في الاسواق ؟.
في الوقت الحالي قطاع الثروة الداجنة في مصر  بيواجه أزمة شديدة بسبب ارتفاع أسعار الكتكوت الأبيض من 8.5 إلي 53.5 جنيه في الأسواق والسعر ده اول مرة يوصل له سعر الكتكوت الأبيض من سنة 2022 .

أزمة ارتفاع اسعار الكتكوت الأبيض ووصوله لـ53 جنيه، خلي وزارة الزراعة واستصلاح الاراضي تاخذ قرار باستيراد الكتكوت الابيض من الخارج علشان تسد العجز الموجود حاليا في الانتاج خصوصا أن الأزمة لو فضلت علي الوضع الحالي هتكون أزمة هتهدد قطاع الثروة الداجنة بشكل كامل.
طيب اية هيا اسباب ارتفاع اسعار الكتكوت الأبيض في الأسواق ؟.
شعبة الدواجن بالغرفة التجارية بالجيزة قالت أن في مشكلة في تسعير الدواجن رغم أنه مفيش أي تراجع في حجم الإنتاج، وأن الزيادات الاخيرة في اسعار الفراخ بالاسواق سببه الارتفاع الكبير في سعر الكتكوت واللي سعره ارتفع من 8.5 الي أكثر من 50 جنيه حاليا.
شعبة الدواجن استغربت من ارتفاع سعر الكتكوت ووصوله لأكتر من 50 جنيه خصوصا أن تكلفته لا تتعدى الـ20 جنيه، وده خلي الدولة تاخذ قرار سريع لانقاذ السوق من خلال فتح باب استيراد الكتاكيت من الخارج علشان التوازن يرجع مرة تانية للسوق المصري وميكونش في زيادة جديدة في أسعار الدواجن علي المواطنين خصوصا أن الدولة حاليا بتستهدف استقرار الاسعار بالاسواق .
الشعبة كملت كلامها وقالت أن الفترة اللي جاية اسعار الدواجن في الاسواق هترجع لطبيعتها مع بدء استيراد الكتكوت الابيض وتعذية مزراع انتاج الدواجن بيها، وهترجع الاسعار تنخفض تاني، ومع توفير الكتكوت الابيض هترجع كمان اسعار البيض لطبيعتها خصوصا ان ارتفاع سعر الكتكوت مرتبط بارتفاع اسعار البيض والداوجن وحاجات كتيرة مرتبطة بقطاع الثروة الداجنة بشكل كامل.