إستغاثة خريجي كلية التكنولوجيا و التنمية … إلي كل من يهمه الأمر

 

قنا … أسعد علي أحمد

تقدم خريجوا كلية التكنولوجيا و التنمية بإستغاثة و همسة عتاب إلي كل من يهمه الأمر

و عنهم تتحدث …

صفاء يوسف محمد موسى خريجة تكنولوجيا وتنمية شعبة علوم مالية وإدارية قسم محاسبة تخصص بنوك ومؤسسات مالية بتقدير عام جيد جدا

بإختصار هتكلم عن الكليه بتاعتى العظيمه : إنه غير معترف بيها ف سوق العمل … إزاى؟!

يعنى مثلا لو قدمت في مسابقة لأحد البنوك … بيقلولى إيه الكلية دى نحن أول مرة نسمع عنها؟؟

إزاى أول مرة تسمعوا عنها وهى مدرجة تحت بند وزارة التعليم العالى وموجودة في جامعة الزقازيق ودى حكومية يعنى ليست خاصة.. خالص

وكمان عاوزة أقول : إن الكلية بتاعتنا أحسن من كليه تجارة بمليون مره … هتقولى إزاى؟

:دي كلية الشعب هقولك ان الكلية فيها أقسام وتخصصات مش موجودة في اى كلية علي مستوى الجمهورية وكمان بنظام الساعات المعتمدة الذي هو أصلا النظام المتبع في بلاد برة

أولا الكليه شعبتين

شعبه علوم مالية وادارية

و شعبه علوم زراعية

علوم مالية وإدارية فيها أقسام ودى شعبتى أنا فهشرحها بالتفصيل

الشعبة دى فيها أربع أقسام (محاسبة_إقتصاد_إدارةأعمال_

تسويق إليكترونى)

هتكلم عن قسمى أنا وهو قسم المحاسبة

هو منقسم لتخصصين (تخصص بنوك ومؤسسات مالية _تخصص قطاعات)

يعنى بدرس تخصص التخصص بعمق والله كمان بدرس مواد بالإنجلش

وبدرس مواد فيها الأكسيل المحاسبى

هل كلية تجارة فيها التخصص ده ؟!

هل بساعات معتمدة؟!

هل فيها التقسيمة دى؟!

وبعد هذا كله لو تقدمنا لأى وظيفة حكومية .. لايذكر اسم الكلية أصلا فبنضطر نقدم تحت بند كلية تجارة وخلاص قولنا ممكن لسه عشان جديدة

بنتفاجئ بردهم ايه الكلية دى نحن أول مرة نسمع عنها وأنا هثبت لحضراتكم الردود للعديد من زملائي … وللأسف دول أوائل دفعه كمان

يعنى حرام لما أروح أقضى أربع سنوات في الغربة وفي الآخر ملاقيش ثمرة تعبى ولا تعب أهلى ف خلال الفترة دى كلها …..

امتحنت أنا و زميلائي في مسابقة مصلحة الضرائب ولم يسلم العمل لأي منا …. قولنا ممكن لم نجح في الإمتحان..

فامتحنت في مسابقة بنك مصر وقالى برضو نأسف … علي الرغم من أني أجبت على كل أسئلة الإمتحان ومتاكدة من إجاباتي … قولت مش مشكلة

امتحنت في مسابقة البنك الزراعى المصري

وبرضو نفس النظام متبعتليش المرحلة التانية ويوم ما ذهبت إلي الإمتحان

.. قالولى إيه الكلية دى … دى معهد كفاية

وكان أمامها شهادة التخرج بتوضح كل البيانات… إنها كلية و ليست معهد كفاية

لذا أرجو من سيادتكم إعطاء المساحة المطلوبة لخريجي كلية التكنولوجيا والتنمية في سوق العمل ولكم جزيل الشكر والإحترام

%d مدونون معجبون بهذه: